Cheyenne

De Cheyenne san a Voik vo de nordamerikanischn Indiana. Eana Sproch gheat zu de Algonkin-Sprochn. Des Voik vo de Cheyenne is aus zwoa vabindatn Stämm enstondn, de Só'taeo'o (aa Sutaio) und de Tsétsêhéstâhese (aa Tsitsistas).

De Cheyenne ghean zu de bekonntastn Prärie-Indiana ibahapts. Se hom si woascheinli ebba um 1500 n.Chr. vo da Algonkin-Gruppn um de Großn Seen (Great Lakes) losglest. Se san im Lauf vo da Zeit auf Westn gwandat, hom an Mississippi iwaqueat und san auf Noad- und Siid-Dakota (South Dakota) einizong. Im frian 19. Joahundat hom de Cheyenne a oaheitlichs Voik buidt, mit iwaregionaln Autoritätn und gmoasoman Ritn und Struktuan. Des is a großa Untaschied zu de ondan Prärie-Indiana. Se woan um de Black Hills vo Siid-Dakota dahoam und im Puiva-Fluss-Lond (Powder River Country) vom heitign Montana. Vo de Lakota sans vo de Black Hills vadrängt woan.